གསང་བ་འདུས་པའི་སྨིན་གྲོལ་རྒྱུན།

རྒྱུད་ཀྱི་རྒྱལ་པོ་གསང་བ་འདུས་པའི་སྨིན་གྲོལ་གྱི་རྒྱུན། དིང་གི་དུས་སུ་བཀའ་བརྒྱུད་པ་ལ་མེད་རབས་ཅོལ་ཆུང་འགའ་རེས་བཤད་པ་ནི། རང་ཉིད་ཀྱི་སྐལ་བ་དམན་པའི་མཐོང་སྣང་ཙམ་སྟེ། གང་ཟག་གཞན་པའི་ཞུ་གནང་གི་ལོ་རྒྱུས་བསྙད་པ་ཙམ་མིན་པར། ཕྲན་གྱི་བསོད་ནམས་ཀྱི་བགོ་སྐལ་དུ་ཐོབ་པའི་བླ་བརྒྱུད་ཙམ་ཞུས་ནའང་། བཀའ་བརྒྱུད་རིན་པོ་ཆེའི་བསྟན་འཛིན་སྐྱེས་ཆེན་རྣམས་ཙམ་མ་ཟད། རྗེས་འཇུག་ཐ་མ་བ་དག་ལའང་གསང་འདུས་ཀྱི་སྨིན་གྲོལ་གྱི་རྒྱུན་ཡོད་མེད་ཤེས་པར་འགྱུར་བས་ན། རྒྱལ་བ་རྡོ་རྗེ་འཆང་ནས་སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་དང་། དེ་ནས་འཇམ་མགོན་བློ་གྲོས་མཐའ་ཡས་ཀྱི་བར་དུ་བླ་མ་བརྒྱུད་པའི་རིམ་པ་ལས་ཇི་ལྟར་བྱུང་བ་བཀའ་བརྒྱུད་སྔགས་མཛོད་ཀྱི་བརྒྱུད་ཡིག་ཏུ་ཕྲེང་བ་སྐོར་ཕུད་ཀྱིས་བྲིས་ཡོད། འཇམ་མགོན་བློ་གྲོས་མཐའ་ཡས་ནས་རིམ་པར། སི་ཏུ་པདྨ་དབང་མཆོག་རྒྱལ་པོ། ཀརྨ་པ་རིག་པའི་རྡོ་རྗེ་དང་། ཁོང་གིས་འབྲས་ལྗོངས་རུམ་བཏེག་དང་བལ་ཡུལ་རྒྱལ་ས་དག་ཏུ་ཐེངས་རེ་གནང་བ་གོ་ཤྲི་རྒྱལ་ཚབ་རིན་པོ་ཆེས་གསན། ཁོང་གིས་རྡོ་རྗེ་གླིང་མི་རིག་འབོ་དཀར་དགོན་པ་དང་། འབྲས་ལྗོངས་ར་ལང་དཔལ་ཆེན་ཆོས་གླིང་དག་ཏུ་གནང་བའི་སྨིན་གྲོལ་གྱི་ཡིག་སྣ། བསྐྱེད་རིམ་དང་འབྲེལ་བ་དྲུག །རྫོགས་རིམ་དང་འབྲེལ་བ་བཞི་སྟེ་ཆོས་ཚན་བཅུ་འདུག་པ་ཆ་ཚང་བ་ཁོ་བོས་ཀྱང་ཐོབ་པ་ཡིན་ནོ། ། སྨིན་གྲོལ་གྱི་རྒྱུན་ཡོད་པ་ཙམ་དུ་མ་ཟད། གསང་བ་འདུས་པའི་སྒྲུབ་མཆོད་ཚོགས་པའི་ཕྱག་ལེན་གྱི་རྒྱུན་ཡང་ཡོད་ལ། ནཱ་རོ་ཆོས་དྲུག་གི་ཉམས་ལེན་དང་མངོན་རྟོགས་ཅན་ཡོད་པས་ན་གསང་བ་འདུས་པའི་ཉམས་རྟོགས་ཅན་ཡང་དོན་གྱིས་ཡོད་པར་འགྱུར་བ་སྟེ། ཤེས་བྱ་ཀུན་ཁྱབ་ལས། ཐབས་ལམ་ནཱ་རོ་ཆོས་དྲུག་ཏུ་གྲགས་པ་ཉིད་འཆད་པའི་སྐབས་སུ་བབས་པ་སྟེ། འདི་ཉིད་རྒྱུད་སྡེ་གང་ལ་བརྟེན་པའི་རྫོགས་རིམ་ཡིན་ཞེ་ན། བླ་མ་གོང་མ་རྣམས་ཀྱིས། གདམས་པ་འདི་ནི་ཕ་རྒྱུད་གསང་བ་འདུས་པ། མ་རྒྱུད་མ་ཧཱ་མཱ་ཡཱ། སྙིང་པོ་ཀྱཻ་རྡོ་རྗེ། ཡང་སྙིང་བདེ་མཆོག་འཁོར་ལོ། བཀའ་སྲུང་ཅན་གྱི་གདན་བཞི་རྣམས་ལ་བརྟེན་ནོ། །ཞེས་ཁྱད་པར་ཅན་གྱི་རྒྱུད་སྡེ་ཆེན་པོ་ལྔ་རྩ་བཤད་ཆ་མཐུན་གྱི་རྒྱུད་ཡན་ལག་དང་བཅས་པ་ལ་བརྟེན་པར་གསུངས་པ་ནི་རགས་པ་ཙམ་སྟེ། དོན་དུ་ན་རྣལ་འབྱོར་ཆེན་པོའི་རྒྱུད་མཐའ་དག་དང༌། ཁྱད་པར་གཉིས་སུ་མེད་པའི་རྒྱུད་ཀྱི་རྫོགས་རིམ་མཐར་ཐུག་པ་ཡིན་ཏེ། གསང་བ་འདུས་པ་སོགས་ཕ་རྒྱུད་སྐོར་ནས་རླུང་གི་རྣམ་གཞག་ཤིན་ཏུ་རྒྱས་པ་དང༌། སྒྱུ་ལུས་འོད་གསལ་དང་བཅས་པའི་གདམས་པ་གསལ་བར་གསུངས་པ་དང༌། མ་རྒྱུད་བདེ་དགྱེས་སྐོར་ནས་རྩ་དང་ཐིག་ལེའི་རྣམ་གཞག་ཤིན་ཏུ་རྒྱས་པ་དང༌། གཏུམ་མོ་ལས་རྒྱ་དང་བཅས་པའི་རྣལ་འབྱོར་གསལ་བར་གསུངས་པ་དང༌། རྡོ་རྗེ་མཁའ་འགྲོ་དང་སྡོམ་འབྱུང་སོགས་ནས་རྨི་ལམ་དང་བར་དོ། སཾ་ཊ་དང་གདན་བཞི་སོགས་ནས་འཕོ་བའི་གདམས་ངག་རྣམས་གསལ་བར་གསུངས་ཤིང༌། ཁྱད་པར་གཉིས་སུ་མེད་པའི་རྒྱུད་དུས་ཀྱི་འཁོར་ལོ་རྩ་བ་དང་བསྡུས་པའི་རྒྱུད་སེམས་འགྲེལ་སྐོར་དང་བཅས་པར་རྩ་རླུང་ཐིག་གསུམ་གྱི་རྣམ་གཞག་དང་གཏུམ་མོ་ལས་རྒྱ་སོགས་ཀྱི་རྣལ་འབྱོར་ཤིན་ཏུ་རྒྱས་ཤིང་གསལ་བར་གསུངས་པའི་ཕྱིར་རོ། །ཞེས་རྗེ་མི་བསྐྱོད་ཡབ་སྲས་རྣམས་བཞེད་དོ། །ཞེས་གསུངས་པ་ལས་ཤེས་པའི་ཕྱིར་རོ། །