སྐྱེས་མཆོག་མར་པ་ལོ་ཙཱའི་རྣམ་ཐར་ནི།
༈ བཞི་པ་སྐྱེས་མཆོག་མར་པ་ལོ་ཙཱའི་རྣམ་ཐར་ནི།
དེའང་དང་པོ་སྐུ་འཁྲུངས་ཡུལ་ལྷོ་ཕུ་ཆུ་ཁྱེར་བྱ་བར་ཡབ་མར་པ་དབང་ཕྱུག་འོད་ཟེར་དང༌།
ཡུམ་རྒྱལ་མོ་འོད་དེ་བྱ་བའི་སྲས་སུ་ཆུ་ཕོ་བྱི་བའི་ལོ་ལ་སྐུ་བལྟམ།
སྐུ་མཛེས་པ་དང་ཐུགས་རབ་ཆེ་བར་བྱུང༌།
དེ་ནས་སློབ་དཔོན་རྙིང་མ་བ་ལས་སློབ་གཉེར་མཛད་འབྲི་ཀློག་ཀྱང་མཁས་པར་གྱུར།
འོན་ཀྱང་ཐུགས་རྒྱུད་ཧུར་ཞིང་སྤྱོད་ལམ་འཆོལ་པས་ཁྱིམ་གྱི་ནོར་རྫས་ཤོར་གོད་ཆེ་བར་བྱུང༌།
ཉིན་གཅིག་ཆང་གྲལ་དུ་སྐྱོ་བ་སྐྱེས་ནས་ངས་འཇིག་རྟེན་གྱི་བྱ་བ་འདི་ལ་དགོས་པ་ཅི་ཡང་མི་འདུག་པས་དེ་བས་རྒྱ་གར་དུ་འགྲོ་ནས་ལོ་ཙཱ་བསླབ་སྟེ་ཆོས་གཅིག་བྱ་དགོས་བསམ་པའི་གྲོས་ཉེ་དུ་རྣམས་ལ་བྱས་པས་ཀུན་གྱི་བློར་འཐད་པ་བྱུང་ནས་དེ་དག་གིས་གསེར་དང་རྟ་གཉིས་གྲོ་ཆས་སོགས་ཀྱིས་རྫོངས་པ་བྱས།
མར་པས་དེ་རྣམས་རྟ་ལ་བཀལ་ནས་མྱང་སྟོད་རྩིས་ཀྱི་ལྷ་ཁང་དུ་གཉོས་ལོ་ཙཱ་དང་འཕྲད།
དེ་ནས་མྱུ་གུ་ལུང་དུ་འབྲོག་མི་ཤཱཀྱ་ཡེ་ཤེས་མཇལ།
དེར་ལོ་ཙཱ་ཡང་བསླབ་ཆོས་ཀྱང་ཞུ་སྙམ་པར་ཆོས་སྒོ་དྲག་པས་འདུག་སྙིང་མ་འདོད།
འདི་བས་རྒྱ་གར་དུ་འགྲོ་དགོངས་བྱོན་པས་བལ་དུ་ཡུལ་སླེབས།
ནགས་འདབས་ཤིག་ཏུ་པཎ་ཆེན་ནཱ་རོའི་སློབ་མ་སྤྱིི་ཐེར་བ་དང༌།
པཻ་དྷ་པ་གཉིས་བཞུགས་ཟེར་བར་དད་ནས་མཇལ་དུ་བྱོན། དེར་ཕྱག་རྟེན་ཕུལ་ནས་ཆོས་ཞུས།
དགྱེས་རྡོར་གྱི་རྒྱུད་གདམས་ངག་མང་དུ་གསན། དབང་བསྐུར་ཀྱང་ཐོབ།
ད་བོད་དུ་ལོག་ནས་གསེར་བཙལ་ཏེ་སླར་རྒྱ་གར་དུ་འགྲོ་བསམ་ནས་ཚུར་བོད་དུ་ལོག
།དེར་ཉ་མ་དང་མི་སྐྱ་སོགས་ཆོས་ཞུ་མང་དུ་བྱུང་བས་འབུལ་བ་ཆེ་བར་བྱུང༌།
རྟ་ནག་པོ་སེང་གེ་སྲབ་མེད་དང༌། སེང་ལྡེང་སྒ་བཀྲ་དང༌།
ཟབ་ཆེན་ཡུག་གཅིག་གཙོས་ཡོ་བྱད་ཐམས་ཅད་གསེར་དུ་བསྒྲིལ་བས་གསེར་སྲང་བཅོ་བརྒྱད་ཙམ་འགྲུབ་པ་བསྣམས་ནས་ཀློག་སྐྱར་ཕེབས།
དེར་གསེར་སྲང་ལྔ་བཅུ་ཡོད་པ་ཁྱེར་ནས་བལ་ཡུལ་དུ་བྱོན།
རང་བྱུང་གི་མཆོད་རྟེན་དྲུང་དུ་ལོ་གསུམ་དུ་ཚད་པ་གོམས་པ་དང་ལོ་ཙཱ་བསླབ་སྤྱི་ཐེར་བ་ལས་གདན་བཞིའི་སྐོར་དང་ལྷ་མོ་དུད་སོལ་མ་སོགས་གསན།
དེ་ནས་རྒྱ་གར་དུ་བྱོན་ནས་པཎྜི་ཏ་ཡེ་ཤེས་སྙིང་པོ་དང་ཀུ་སུ་ལུ་པ་སོགས་བརྟེན་ཅིང་ཀྲི་ཡ་ཕ་རྒྱུད་མ་རྒྱུད་སྐོར་གསན་ནས་ལོ་ལྔ་སོང་བ་དང༌།
ཡང་རྒྱགས་ཆད་ནས་བལ་པོར་ཕྱིན་པས། ལྷོ་བྲག་ནས་ཉེ་གཞིས་དང༌།
གཙང་གི་སློབ་མ་རྣམས་ཀྱིས་གསེར་མང་པོ་བསྡུས་ནས་བསྐུར་ཏེ་བསྐྱལ་བ་དང་འཕྲད།
བལ་པོར་བླ་མ་རྣམས་ལ་ཞོ་ཤས་ཀྱི་མཎྜལ་ཕུལ།
དེ་ནས་རྒྱ་གར་དུ་བྱོན་ནས་གོང་གི་བླ་མ་རྣམས་ལ་གསེར་གྱི་མཎྜལ་ཕུལ།
པཻ་དྷ་བ་སྐུ་མཆེད་ཀྱིས་ནཱ་ལེནྜའི་དགེ་ཚུལ་ཤེས་རབ་སེང་གེ་ལ་བླ་མ་ཆེན་པོ་དང་མཇལ་བའི་ཞུ་སྣ་མཛད་ཐུགས་ལ་འདོགས་པར་ཞུ་ཞེས་ཡི་གེ་དང་ཚོགས་པ་ལ་སྦྲག་ནས་བཏང་བས་ནཱ་ལེནྜའི་བྱང་སྒོར་དགེ་ཚུལ་ཤེས་རབ་སེང་གེ་དང་མཇལ།
ལོ་རྒྱུས་ཞུ་བ་ཕུལ་བས་བླ་མ་ཆེན་པོ་རྒྱ་གར་ནུབ་ཕྱོགས་སུ་ཆོས་གསུང་ལ་གཤེགས།
ཅུང་སྔ་བས་ངལ་གསོས་གསུངས། ཉིན་གཅིག་བླ་མ་ནཱ་རོ་ཆེན་པོ་བྱོན་ཞིང་ཡོད་ཟེར།
དེ་ཉིད་དུ་ཤེས་རབ་སེང་གེས་མར་པ་ཁྲིད་ནས།
པཱུ་ལ་ཧ་རིའི་དགོན་པ་དེར་བླ་མ་ནཱ་རོ་ཆེན་པོ་དེ་ཉིད་ཤིང་སྡོང་པོ་ལ་སྐུ་རྒྱབ་བཏད་ནས་འབྲས་ཆེན་ཞིག་གསོལ་ཞིང་འཁོར་མང་པོ་ལ་ཆོས་གསུངས་པ་དང་མཇལ།
མར་པས་གསེར་གྱི་མནྜལ་ཕུལ་ཞིང་ཕྱག་དང་བསྐོར་བ་བྱས་ཞབས་སྤྱི་བོར་བླངས།
ཉེ་གནས་ཤེས་རབ་སེང་གེས་ལོ་རྒྱུས་ཞུ་བ་ཕུལ། ཁྱོད་མིང་ཅི་ཡིན་གསུང༌།
ཆོས་ཀྱི་བློ་གྲོས་བྱ་བ་ལགས་ཞུས་པས་ཐུགས་དགྱེས། དབང་བསྐུར་ཨི་ཐོབ་གསུངས།
བལ་པོར་བླ་མའི་སློབ་མ་རྣམས་ལས་དགྱེས་རྡོར་གདན་བཞི་སོགས་ཀྱི་དབང་ཐོབ་ཞུས་པས་དེས་ཆོག་གསུངས།
བདེ་དགྱེས་རྣལ་འབྱོར་མ་སོགས་རྒྱུད་སྒྲུབ་ཐབས་རྣམས་གནང༌།
ཐབས་ལམ་གཏུམ་མོ་དང་གྲོལ་ལམ་ཕྱག་རྒྱ་ཆེན་པོ་རྣམས་ཐོབ།
དེ་ནས་བླ་མས་ལུང་བསྟན་པ་བཞིན་དུག་མཚོ་ཁོལ་མའི་ཆུ་ལས་བརྒལ་ལུས་དུག་སྦྲུལ་ཤུན་པ་ལྟར་བརྗེས་ནས་ནུབ་དུ་ལ་ཥེ་ཏྲའི་དགོན་པར་ཡེ་ཤེས་སྙིང་པོའི་ཞབས་ལ་བཏུད་དེ་བསྙེན།
དེའང་ནུབ་དུ་ལ་ཥེ་ཏྲའི་གྲོང་ཁྱེར་དུ། དཔལ་ཡེ་ཤེས་སྙིང་པོའི་ཞབས་ལ་གཏུག
།ཕ་རྒྱུད་གསང་བ་འདུས་པ་ཉན། སྒྱུ་ལུས་འོད་གསལ་གྱི་གདམས་པ་ཐོབ།
ལམ་རིམ་པ་ལྔའི་དོན་ལ་བསླབ། ཅེས་གསུངས་པ་ལྟར་རོ།
།དེར་ཁ་སརྤ་ཎི་རང་བྱུང་གི་མཆོད་རྟེན་དུ་ཕྱིན་པས་གཉོས་ལོ་དང་འཕྲད།
ཅི་ཤེས་ཟེར་བར་དགྱེས་རྡོར་ཤེས་བྱས་ནས་བགྲོ་གླེང་བྱས་པས་མར་པ་རྒྱལ། གཉོས་ན་རེ།
གནས་པ་རྩ་ལ་གཡོ་བ་རླུང།
བཀོད་པ་བྱང་ཆུབ་སེམས་དང་གསུམ་བྱ་བའི་གདམས་ངག་སྒྱུ་མ་ཆེན་པོ་བྱ་བ་དགོས་པ་ཡིན།
དགྱེས་རྡོར་ག་ན་ཡང་ཡོད་ཟེར།
མར་པ་ནཱ་རོ་པའི་དྲུང་དུ་བྱོན་ནས་མ་ཧཱ་མཱ་ཡའི་གདམས་ངག་གནང་བར་ཞུ་ཞུས་པས།
།མ་ཧཱ་མཱ་ཡ་ང་མཁས་ཏེ་བདག་པོ་ཀུ་ཀུ་རི་པ་ཡིན་པས་དེར་གཏོང་གསུངས།
སོ་ས་གླིང་ནས་རྣལ་འབྱོར་པ་གསུམ་འཇིགས་པ་སྒྲོལ་བའི་གྲོགས་སུ་བཀུགས་ནས་ལྷོ་དུག་མཚོ་ཁོལ་མ་ཆུང་སར་བོལ་ནུབ་ཆེ་སར་པུས་ནུབ་ཙམ་གྱི་ཟླ་བ་ཕྱེད་སོང་ནས་ཆུ་ཡི་ཕར་ཁར་ཕྱིན་པ་དེར།
སྤྲེའུ་འདྲ་བའི་ལུས་སྤུས་འཐུམ་པའི་གསེབ་ནས་མིག་དམར་ཀེཾ་ཀེཾ་བྱེད་པ་ཅིག་འདུག་པར་བླ་མ་ཀུ་ཀུ་རི་པ་མཐོང་ངམ་བྱས་པས།
ང་སྔོན་ནས་འདིར་བསྡད་པ་དེ་འདྲ་མ་མཐོང་ཟེར།
བླ་མས་ཆ་ལུགས་མ་ངེས་པ་གསུངས་པ་དྲན་ནས་དེ་ཉིད་དུ་ཕྱག་འཚལ་མཎྜལ་ཕུལ་གདམས་པ་གནང་བར་གསོལ་བ་བཏབ་པས།
ཁྱོད་འདིར་སུས་བཏང་གསུངས། བླ་མ་ནཱ་རོ་པ་ལགས་བྱས། ནཱ་རོ་པ་ཟེར་ནས་གཤེ་ཡིན་གདའ།
དེ་ལ་རྟོག་པ་ཞིག་སྐྱེས་པ་ལ། ཐེ་ཚོམ་སྐྱེ་མི་དགོས་གསུངས།
ཁྱོད་བསུ་བར་རྣལ་འབྱོར་པ་གཉིས་བཏང་ཡོད་འཕྲད་དམ་གསུངས། བྱ་གཉིས་མིན་པ་མ་འཕྲད་ཞུས།
འོ་དེ་ཀ་ཡིན་གསུངས།
ད་ཕར་འདོང་གདམས་ངག་བྱ་ཡིས་གསུངས་ནས་ནགས་གསེབ་ཏུ་བཞུགས་སར་ཕྱིན་ནས་དབང་བསྐུར་ཞིང་ཟླ་བ་ཕྱེད་བཞུགས།
ཀུག་ཆེན་ཀུག་ཆུང་ལ་སོགས་རྫོགས་རིམ་ཉི་ཤུ་རྩ་བཞི་ཡན་ལག་དང་བཅས་པ་གནང༌།
དེ་ཡང་དམན་པ་དབྱིབས་ཀྱི་རྣལ་འབྱོར་ལ་བརྟེན་ནས་ཕྱག་རྒྱ་གསུམ་ལམ་དུ་བྱེད།
ཟབ་པ་སྔགས་ཀྱི་རྣལ་འབྱོར་ལ་བརྟེན་ནས་རིག་པ་གསུམ་ལམ་དུ་ཁྱེར།
མཐར་ཐུག་ཆོས་ཀྱི་རྣལ་འབྱོར་ལ་བརྟེན་ནས་གནད་ཀྱི་ཆིང་ལྔ་རྫོགས་རིམ་དང་བཅས་པ་འདི་ལྟ་བུར་ཡིན་ནོ་གསུངས་ཤིང་རྫོགས་པར་གནང༌།
ཕྱག་སྤྱི་བོར་བཞག་ཅིང་བྱིན་གྱིས་བརླབས་ནས།
ད་སོང་དང་ལམ་དུ་བར་ཆད་མི་འབྱུང་ཞིང་མྱུར་དུ་ཕྱིན་པར་འགྱུར་རོ་གསུངས།
དེ་ནས་གཏང་རག་གི་ཚོགས་གྲལ་དུ་རྟོགས་པ་ཕུལ་བའི་མགུར་ནི།
དུས་གསུམ་སངས་རྒྱས་རྣམས་ཀྱི་སྲས།
ཞེས་སོགས་ཕུལ་ཞིང་དེ་ནས་བྱོན་པས་བླ་མའི་ཐུགས་རྗེས་ཞག་བདུན་ནས་པཱུ་ལ་ཧ་རིར་སླེབས་ཏེ་ལོ་རྒྱུས་རྣམས་བླ་མར་ཞུ་སྙམས་པར་ཚུར་ལ་ཞིབ་མོར་གསུངས།
ད་ཡང་ངས་ཚར་གཅིག་བྱ་གསུངས་ནས་གནང་བས་ནམ་ལངས་པའི་སྟེང་ཉི་མ་ཤར་བ་བཞིན་སོང་བས་དད་པ་ལྷག་པར་སྐྱེས་སོ།
།ཡང་རེ་ཞིག་གནས་གཞི་ཞིག་ཏུ་གཉོས་ལོ་དང་འཕྲད་མ་ཧཱ་མཱ་ཡའི་སྐོར་ལ་བསྒྲོ་གླེང་བྱས་པས་མར་པ་རྒྱལ་བས།
བླ་མ་སུ་ལས་ཉན་ཟེར་བའི་ལན་དུ། དམན་པ་དབྱིབས་ལ་ཟབ་པ་སྔགས།
མཐར་ཐུག་ཆོས་ཀྱི་རྣལ་འབྱོར་རྣམས། ལེགས་པར་སྟོན་པའི་སློབ་དཔོན་ནི།
བླ་མ་ཐར་པའི་ལམ་སྟོན་ཡིན། ཞེས་མཚན་གསང་ཞིང་སྨྲས་པས་ཁོ་ན་རེ།
དེ་ལས་ཉི་ཟླ་ལྟར་གྲགས་པའི་གསང་བ་འདུས་པའི་ཆོས་རྣམས་གལ་ཆེ་ཟེར།
གཉོས་ཀྱིས་བླ་མ་དེ་འདྲ་གང་དུ་བཙལ་ཀྱང་མ་རྙེད་པར་གྲགས།
དེ་ནས་བདག་ལ་གསང་བ་འདུས་པ་གནང་བར་ཞུ་ཞུས་པས་དུས་ཤིག་ན་སྟོན་གསུངས།
དེ་ནས་པཱུ་ལ་ཧ་རིའི་དགོན་དུ་ཉིན་གཅིག་གི་ཚེ།
ཁ་ཆེའི་པཎྜི་ཏ་ཨ་ཀར་སིདྡྷི་བྱ་བ་དེ་བྱུང་ནས།
བདག་རྒྱ་ནག་རི་བོ་རྩེ་ལྔར་བསྒོམ་དུ་འགྲོ་བས། གསང་བ་འདུས་པ་གནང་བར་ཞུ་ཞུས་པས།
ནཱ་རོ་པའི་ཞལ་ནས་ལོ་ཙཱ་བ་ཁྱོད་ཀྱི་དུས་ལ་བབ་བོ་གསུངས།
དེ་ནས་དབང་བསྐུར་ཞིང་གདམས་ངག་རྣམས་རྫོགས་པར་གནང༌།
དེ་ནས་མངའ་བདག་མཻ་ཏྲི་པ་མཇལ་དུ་འགྲོ་བ་ལ་ཞུས་པས་གནང་ཞིང་སོང་བས།
ཆུ་བོ་གང་གཱའི་འགྲམ་རི་བོ་མེ་ལྟར་འབར་བའི་གནས་སུ་བཞུགས་པ་ལ།
ཕྱག་དང་གསེར་གྱི་མཎྜལ་ཕུལ་ནས་ཞུས་པས། རྒྱུད་བསྟོད་པ་གླུར་བླངས་དང༌།
ཕྱག་རྒྱ་ཆེན་པོ་ལ་སོགས་པ་གདམས་པ་དཔག་ཏུ་མེད་པ་གནང་སྟེ། ཇི་སྐད་དུ།
ཤར་ཆུ་བོ་གང་གཱའི་འགྲམ་དུ་ཕྱིན། །རྗེ་མཻ་ཏྲི་ཆེན་པོའི་བཀའ་དྲིན་གྱིས།
།གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྤར་ཟིན་བྱས།
།དོན་སྤྲོས་བྲལ་གཉུག་མའི་ངོ་བོ་མཐོང༌། །སྐུ་གསུམ་མ་དང་མངོན་དུ་མཇལ།
།མི་ཁོ་བོའི་སྤྲོས་པ་དེ་ནས་ཆོད། །ཅེས་གསུངས་སོ།
།དེ་ནས་གཏང་རག་གི་མཆོད་པའི་སྐབས་སུ་རྟོགས་པ་ཕུལ་བའི་མགུར་ནི།
།ལས་ཀྱི་ས་ཡི་འཛམ་གླིང་འདིར། །བྲམ་ཟེའི་རིགས་ལས་སྐྱེ་བ་བཞེས།
།ཕྱི་ནང་གྲུབ་མཐའ་ཐམས་ཅད་མཁྱེན། །པཎྜི་ཏ་ལ་ཕྱག་འཚལ་ལོ། །ཞེས་སོགས་མཛད་དོ།
།ཡང་ནཱ་རོ་པའི་ཞལ་ནས། ལྷོ་དུག་མཚོ་ཁོལ་མའི་ཕར་ཀ་རྩྭའི་སྤྱིལ་པོའི་ནང་དུ།
ཡེ་ཤེས་ཀྱི་མཁའ་འགྲོ་མ་རུས་པའི་རྒྱན་ཅན་བཞུགས་པ་ལས། གདན་བཞིའི་སྐོར་རྣམས་ཞུས་གསུངས།
དེར་སོང་བས་བྱིན་རླབས་ཀྱིས་ཆུའི་གནོད་པས་མ་ཚུགས་ཤིང༌།
མཁའ་འགྲོ་མའི་དྲུང་དུ་ཕྱིན་ཏེ།
ཕྱག་དང་གསེར་གྱི་མཎྜལ་ཕུལ་ནས་གདམས་པ་ཞུས་པས་དབང་བསྐུར་ཞིང༌།
གདན་བཞི་ལ་སོགས་གདམས་པ་རྣམས་རྫོགས་པར་གནང༌། གསང་མཚན་བདེ་བའི་རྡོ་རྗེར་བཏགས།
གཞན་ཡང་བླ་མ་མང་པོ་ལས་ཆོས་དཔག་ཏུ་མེད་པ་ཞུས་ཤིང་སྒྲོ་འདོགས་རྣམས་ལེགས་པར་བཅད་དོ།
།དེ་ནས་མར་པ་ལོ་ཙཱས་ད་ནི་ལན་གཅིག་བོད་དུ་འགྲོ་ནས་གསེར་ཞིག་བསྒྲུབ་སྟེ།
མཚན་ལྡན་གྱི་བླ་མ་འདི་ལྟ་བུ་མཇལ་བ་ད་ལན་ཙམ་ཡིན་པས།
འདི་རྣམས་ཀྱི་མདུན་དུ་ཚོགས་ཀྱི་འཁོར་ལོ་བསྐོར་ཞིང་མེ་ཏོག་གི་མཆོད་པ་རེ་ཡང་འབུལ།
རྡོ་རྗེ་གདན་ལ་སོགས་པའི་གནས་ཁྱད་པར་ཅན་འདི་རྣམས་ལ་མཆོད་པ་རེ་འབུལ་སྙམས་ནས།
ང་རེས་གཅིག་བོད་དུ་འགྲོ་བ་ལགས་ཞུས་པས།
ནཱ་རོ་པའི་ཞལ་ནས་ཁྱོད་བོད་དུ་འགྲོ་ན་གསང་སྔགས་ཀྱི་ཆོས་དང༌།
ཡོན་ཏན་ཐམས་ཅད་བླ་མའི་བཀའ་བཞིན་སྒྲུབ་པ་ལས་བྱུང་བ་ཡིན་པས་འདི་བཞིན་ཡིད་ལ་ཟུངས་ཤིག་གསུངས་ནས།
ཆོས་བརྒྱད་ཚེ་འདིའི་རྟ་མ་རྒྱུག །ཅེས་སོགས་གསུངས།
དེ་ནས་གསེར་ལྷག་མ་གང་ཡོད་ཡོ་བྱད་བསྒྲུབ་ནས་ཉི་ཤུ་དགུའི་ནུབ་མོར་རྗེ་ནཱ་རོ་པ་ལ་གཏང་རག་གི་ཚོགས་འཁོར་བསྐོར་བའི་ཚོགས་གྲལ་དུ་རྟོགས་པ་ཕུལ་བའི་མགུར་ཏམྦུ་རའི་ཁོང་འགྱུར་གྱི་རྟ་ལ་དྲངས་ཏེ་ཕུལ་བ་ལ།
རྗེ་མཚན་ལྡན་གྱི་བླ་མ་རིན་པོ་ཆེ་སོགས་ཀྱིས་གསོལ་བ་བཏབ་ཅིང་སྤྱན་ཆབ་ཕྱུང་བར།
བླ་མའི་ཞལ་ནས་རྒྱ་གར་ཕྱོགས་བཞི་ན་གདུལ་བྱ་བྱིན་བརླབ་པའི་སློབ་དཔོན་བཞི་ཡོད་དེ།
ཤར་ཕྱོགས་བྷཾ་ག་ལར་ནག་པོ་ཞབས། ལྷོ་ཕྱོགས་སེང་ག་གླིང་དུ་ནཱ་གརྫུ་ན།
ནུབ་ཕྱོགས་ཨོ་རྒྱན་དུ་ཨིནྜ་བྷུ་ཏི།
བྱང་ཕྱོགས་པརྤ་ཏ་རུ་ངས་བྱིན་གྱིས་བརླབས་པ་ཡིན་ནོ།
།ཁོ་བོ་ལ་ཏཻ་ལོ་པས་ཁྱོད་ལུང་བསྟན་པའི་བུ་ཡིན་པས་བོད་ཡུལ་དུ་སོང་ལ་འགྲོ་དོན་གྱིས་ཤིག་དང་བླ་མ་རྣམས་ཀྱང་མཉེས་ཤིང་ང་དང་ཡང་འདུ་འབྲལ་མེད་པ་ཡིན་གསུངས་ནམ་ཐོ་རས་ཁར་ཕྱག་སྤྱི་བོར་བཞག་ནས།
ནམ་མཁའི་མེ་ཏོག་སྐྱེས་བུ་ཡིས།
ཞེས་སོགས་གསུངས་ཤིང་བརྡ་ཚིག་རྣམས་མ་བརྗེད་པར་བོད་དུ་བྱོན་ནོ།
།དེ་ནས་བལ་བོད་ཀྱི་ས་མཚམས་ལི་ཤྭ་ཀ་ར་བྱ་བ་མཐའ་འཁོབ་ཀྱི་གྲོང་ཁྱེར་ཤྭ་གམ་གཅོད་ས་ཞིག་ཏུ་ཤྭ་གམ་མ་འཕྲོད་ནས་ཞག་ལྔ་ལུས་པའི་ནུབ་གཅིག་རྨི་ལམ་དུ་བྲམ་ཟེའི་བུ་མོ་མཛེས་མ་རྒྱན་སྣ་ཚོགས་ཀྱིས་བརྒྱན་པ་གཉིས་ཀྱིས་ཁྱོད་ལྷོ་ཕྱོགས་དཔལ་གྱི་རི་ལ་བྲམ་ཟེ་ཆེན་པོའི་མདུན་དུ་འགྲོ་དགོས་ཟེར་ཞིང༌།
དར་གྱི་འདོ་ལིའི་ཁ་ན་བཞག་ནས་ཁོ་རང་གཉིས་ཀྱི་ཕྲག་ལ་བཀལ་ནས་སོང་བས།
སྐད་ཅིག་དེ་ཉིད་ལ་བྲམ་ཟེ་ཆེན་པོའི་མདུན་དུ་ཕྱིན་ཏེ།
དོ་ཧ་རྡོ་རྗེ་མགུར་གསུངས་པས་ཕྱག་རྒྱ་ཆེན་པོའི་རྟོགས་པ་མངོན་དུ་གྱུར་ནས་ཐུགས་སྤྲོ་བའི་ངང་ནས་གཙང་གྱེར་ཕུར་བྱོན།
ཀློག་སྐྱ་ཇོ་སྲས་ཀྱི་སྣེ་ལེན་བྱས་ཏེ་ཟླ་བ་ཕྱེད་དུ་ཆོས་གྲྭ་བཙུག་ནས་ཞབས་ཏོག་བཟང་པོ་བྱས།
དེའི་སྐབས་སུ་སྔར་མ་བཞེངས་པའི་གླུ་ཞིག་ཞུ་ཟེར་བས་སྔོན་གྱི་རྨི་ལམ་དུ་བྲམ་ཟེ་ཆེན་པོ་མཇལ་བའི་སྐབས་ཀྱི་དོ་ཧ་རྡོ་རྗེའི་མགུར་གསུངས་པ།
དཔལ་དེ་རིང་བཀྲ་ཤིས་ཡར་གྱི་ངོ༌།
ཞེས་ཁྱུང་ཆེན་གཤོག་བརྒྱང་གི་རྟ་ལ་དྲངས་ཏེ་གསུངས་པས་ཀུན་དད་པར་གྱུར་ཏོ།
།དེ་ནས་ལྷོ་བྲག་ཏུ་བྱོན་པས་སློབ་དཔོན་དང་ཉེ་གཞིས་རྣམས་ཀྱིས་སྣ་ལེན་ཅུང་ཙམ་རེ་བྱས་ཤིང་ཆོས་མཁས་པར་ཤེས་ཀྱང་སྔར་མི་ངན་པའི་དོན་གྱིས་ཞུ་མི་མ་བྱུང༌།
ཆང་ས་ཞིག་ཏུ་སྔགས་པ་ཞིག་དང་ཁ་འགྲས་པས་ཁོ་རྦབ་ཀྱིས་ཤི།
དཔོན་པོ་ཇོ་བོ་དེས་ཁྱེད་ཀྱིས་ཅི་ཤེས་ཟེར། ཧེ་བཛྲ་དང་ཙཀྲ་སམྦྷ་ར་དང༌།
མཉྫུ་ཤྲཱི་ཤེས་བྱས་པས། བ་རི་ཟ་རི་དེ་ཀུན་མ་གོ་ཟེར་ཡང་དོན་ལ་དད་ནས་སྣང༌།
དེ་ནས་དུས་རེ་ཞིག་གི་ཚེ་བྱང་ནམ་རའི་གསེར་ཁ་རྡོར་བ་དང་ཐུག་སྟེ་རྟ་དཀར་པོ་ཞིག་ལ་དཔེ་ཆ་སོགས་ཆ་རྐྱེན་རྣམས་བཀལ་ནས་གཡོག་པོ་གཅིག་ཁྲིད་དེ་ཆུ་འགྲམ་ཞིག་ཏུ་གྲོ་བྱས་པས།
བནྡེ་ཞིག་བྱུང་ནས་ཕྱག་འཚལ་ཏེ་གང་ནས་ཡིན་ཟེར།
ཉེ་གནས་ཀྱིས་གྲུབ་ཆེན་ནཱ་རོ་པའི་སློབ་མ་མར་པ་ལོ་ཙཱ་བྱ་བ་ཡིན་ཞེས་ཞིབ་པར་བཤད།
ཁོང་རྔོག་སྟོན་ཆོས་རྡོར་ཡིན་ཞིང་ཤིན་ཏུ་དད་ནས་གདན་དྲངས།
དབང་དང་གདམས་པ་མང་དུ་ཞུས་ཞབས་ཏོག་བཟང་པོ་བྱས།
དེ་ནས་འཕན་ཡུལ་དུ་བྱོན་ཏེ་སྲིའུ་བཅུ་དགུ་གསོས་པས་རེ་རེ་ལ་གསེར་ཞོ་བཅུ་གཅིག་རེ་བྱུང༌།
རེ་མ་ཏིའི་ངན་སྔགས་བསླབ་པས་གཙང་དར་ཡེ་སོགས་ཆོས་ཞུ་མང་དུ་བྱུང༌།
འབུལ་བ་ཐམས་ཅད་གསེར་དུ་བསྒྱུར་བས་གསེར་མང་དུ་འགྲུབ།
དེ་ཙ་ན་འདམ་སྙིང་དྲུང་གི་ཚོང་པ་མར་པ་མགོ་ཡག་ཟེར་བ་རུས་གཅིག་པའི་ཞེན་གྱིས་ཕྱག་འབུལ་དུ་ཕྱིན།
དེར་གླེང་བསླང་བྱུང་བས་ཁོ་ན་རེ། འཕན་ཡུལ་སྐྱ་མོ་ན་བྱེའུ་ལ་ལྷུ་ཐང་རྩི་བ་ཡིན།
བྱང་ཁ་སྣང་བརྒྱད་ནས་གཡག་ལ་གཟུག་ཐང་བྱེད་ཟེར་བ་ཡིན་པས་ངའི་ཡུལ་དུ་བྱོན་ཟེར།
དེར་འདམ་དུ་ཕྱིན་པས་འབུལ་བ་ཞབས་ཏོགས་མང་དུ་བྱས།
དེ་དུས་ནོར་ལ་ཞེན་པ་ཆེ་བ་ལྟར་མཛད་པས་སློབ་མ་རྣམས་ཅུང་མ་མགུ་བས།
ཁོ་བོ་ནོར་ལ་གཅེས་པ་མ་ཡིན། བླ་མ་རྣམས་ཀྱི་སྐུ་དྲིན་བསབ་པ་དང༌།
རྟེན་ངོ་མཚར་ཅན་རྣམས་ལ་མཆོད་པ་འབུལ་བའི་ཕྱིར་ཡིན་གསུངས་པས་ཀུན་ཡིད་ཆེས་པར་གྱུར།
ཡོན་བདག་འགའ་ཞིག་མ་དད་པ་ལ་ལུ་གུ་དང་གཡག་ཤི་བའི་རོ་ལ་གྲོང་འཇུག་མཛད་པས་གྲུབ་ཐོབ་ཀྱི་སྙན་པ་ཕྱོགས་ཀུན་ཏུ་ཁྱབ་ཅིང་ཆོས་ཞུ་དང་འབུལ་བ་ཆེར་བྱུང༌།
དེ་ནས་ནུབ་གཅིག་ནམ་ཐོ་རངས་ཁར་མཁའ་འགྲོ་མ་དཔག་ཏུ་མེད་པ་བྱུང་ནས་གླུ་གར་རོལ་མོའི་སྒྲ་བཅས་གོང་དུ་ནཱ་རོ་པས་གསུངས་པའི་བརྡ་རྣམས་བཀྲོལ་ཅིང་གནང༌།
ཏཻ་ལོས་ལུང་བསྟན་ནཱ་རོའི་བུ། །ལྷུན་གྲུབ་ཆོས་ཀྱི་བློ་གྲོས་ཁྱོད།
།པཱུ་ལ་ཧ་རིའི་དགོན་པ་ན། །རྣལ་འབྱོར་དབང་ཕྱུག་ནཱ་རོ་པ།
།སྐྱེ་བ་མེད་པའི་དབྱིངས་སུ་ཡལ། །ཁྱེད་བཞུད་ན་ངེད་དང་འགྲོགས་ལ་གཤེགས།
ཞེས་ཟེར་ནས་བསྐུལ་བས། རྣལ་སད་པ་དང་གདུང་ཤུགས་དྲག་པོས་མང་དུ་བཤུམ་པ་ལ།
མགོ་ཡག་ལངས་ནས་འདི་ལྟར་མཛད་པ་ཅི་ལགས་ཞུས་པས།
ང་རྒྱ་གར་དུ་འགྲོ་དགོས་པར་འདུག་གསུངས་ཤིང་ཆོས་འཕྲོ་རྣམས་ཚར་བར་མཛད།
དེར་མགོ་ཡག་གིས་གཡུ་སེང་གེའི་མགོ་བྱ་བ་གཅིག་ཇ་ཤོང་སིག་བཞི།
རྟ་ཁྲ་བོ་མགོ་དཀར་སོགས་མང་དུ་ཕུལ་བས་དངོས་པོ་རྣམས་གསེར་དུ་བསྒྱུར་བས་གསེར་སྲང་སུམ་བརྒྱ་ལྷག་འགྲུབ།
མགོ་ཡག་ལ་སོགས་པའི་སློབ་མ་བཅུ་དགུས་མང་ཡུལ་དུ་བསྐྱལ་ནས་སླར་རང་ཡུལ་དུ་ལོག
།དེ་ནས་བལ་པོར་བྱོན་ནས་པེ་དྷ་བ་ལ་གསེར་སྲང་ཕྱེད་ཕྱག་རྟེན་དུ་ཕུལ།
བླ་མས་ཕྱག་ནས་བཟུང་སྟེ་བུ་འོང་ཙ་ཕ་མེད། ཁྱོད་ན་ནིང་མི་ཡོང་བའི་དཔེ་ཅི་ཡོད།
བླ་མ་སྤྱོད་པ་ལ་གཤེགས་གསུངས་མང་དུ་བཤུམ།
དེ་ནས་བླ་མ་སྤྱི་ཐེར་བ་ལ་གསེར་སྲང་གང་ཕྱག་རྟེན་ཕུལ་མཇལ་བས་གོང་བཞིན་གསུངས།
བླ་མ་རྣམ་གཉིས་ལ་ཚོགས་འཁོར་དང་འཕགས་པ་ཤིང་ཀུན་ལ་མཆོད་པ་དང་སྨོན་ལམ་བཏབ་ནས་རྒྱ་གར་དུ་བྱོན།
དགེ་ཚུལ་ཤེས་རབ་སེང་གེ་མཇལ་གསེར་སྲང་གང་ཕྱག་རྟེན་དུ་བྱས།
བླ་མ་སྤྱོད་པ་ལ་གཤེགས་པའི་ལོ་རྒྱུས་ཞིབ་ཏུ་གསུངས། དགྱེས་རྡོར་གྱི་ཐང་སྐུ་གཅིག
།ཀ་པཱ་ལའི་ནང་དུ་རྩ་རྒྱུད་བཞག་པ་གཅིག
།རྡོར་དྲིལ་གཅིག་བཅས་མར་པ་བོད་ནས་ཡོང་བ་ལ་གཏོད་གསུངས།
དེར་མར་པས་བླ་མ་དྲན་ནས་མང་དུ་བཤུམས་ཏེ་ང་ཅི་ལྟར་བྱས་ན་གྲགས་ཞུས་པས།
གསེར་ཅི་ཙམ་ཡོད་གསུངས། མང་དུ་ཡོད་ཞུས་པས། འོ་ན་ཅི་ཡོད་དོན་ལ་བྱ་བ་ཡིན་པས།
མཻ་ཏྲི་བ་ལ་སོགས་གྲུབ་ཐོབ་རྣམས་ཀྱི་མདུན་དུ་སོང་ལ་གསོལ་བ་ཐོབ་དང་ཁྱོད་ལུང་བསྟན་པའི་སྐྱེས་བུ་ལས་འཕྲོ་ཅན་ཡིན་པས།
མཇལ་ནས་འོང་གིས་གསུངས་སོ། །དེ་ནས་རྒྱལ་བ་མཻ་ཏྲི་པའི་མདུན་དུ་སོང་སྟེ།
གནས་དེ་མེ་ཏོག་དམར་པོའི་ཚལ་གྱིས་གང་བའི་འོད་ཀྱིས་མི་ལ་སོགས་མདངས་འཕྲོག་ཅིང་དམར་པོར་བསྒྱུར་ནུས་པས།
མེ་ཏོག་མདངས་འཕྲོག་གི་རི་མེ་ལྟར་འབར་བ་ཟེར་ཏེ།
དེ་ན་ཤིང་སྡོང་པོ་གཅིག་གི་དྲུང་དུ་སྐུ་གཟི་མདངས་དང་བཅས་པར་བཞུགས་པ་ལ།
ཕྱག་དང་གསེར་གྱི་མཎྜལ་ཕུལ་ནས། ཚོགས་ཀྱི་འཁོར་ལོ་ཟླ་བ་གཅིག་བསྐོར་ཏེ་གསོལ་བ་བཏབ་པས།
ངོ་མཚར་གྱི་ཆོ་འཕྲུལ་མང་པོ་ཡང་མཐོང་གནམ་གང་གི་ཉིན་པར། རྨི་ལམ་མི་ངན་རྨི་ལམ་བཟང༌།
།ནོར་བུ་རྒྱལ་མཚན་རྩེ་ལ་ཕྱར། །སྒེག་མོའི་མེ་ལོང་ཟུར་མིག་བལྟ།
།དད་དཔོན་ཆེན་པོའི་གྲུ་གཟིང་གཏོང༌། །བྱ་འཕུར་སྟེང་ན་རྒྱལ་མཚན་བཙུག
།བྱ་མགོ་བོད་དུ་བསྟན་པ་རྨིས། །དཔལ་ནཱ་རོ་པ་དང་མཇལ་ཏེ་འོང༌། གསུངས།
དེ་ནས་ཀུ་ཀུ་རི་པའི་མདུན་དུ་སོང་བས་ཁོང་དུག་མཚོའི་གླིང་ནས་ཚུར་བྱོན་ཏེ།
ཆུ་འགྲམ་དུ་ཤིང་ཏིང་ཏིང་ཀུན་གྱི་རྩ་བར་བཞུགས་པ་ལ།
ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ཞིང་གསོལ་བ་བཏབ་པས། རྗེ་བཙུན་དཔལ་ལྡན་ནཱ་རོ་པ།
།གླང་པོ་ཆེ་ཡི་བལྟ་སྟངས་ཀྱིས། །སྤྱན་མིག་གཉིས་ནི་ཉི་ཟླ་ཡི།
།འོད་ཟེར་བོད་དུ་བཀྱེ་བ་རྨིས། །དཔལ་ནཱ་རོ་པ་དང་མཇལ་ཏེ་འོང༌། ཞེས་གསུངས།
ཁྱེད་ཀྱི་གདམས་ངག་ཐུན་མོང་མ་ཡིན་པ་གཅིག་ཀྱང་ཐོབ་པ་ཡིན་གསུངས།
རུས་པའི་རྒྱན་ཅན་དུར་ཁྲོད་སོ་ས་གླིང་དུ་བཞུགས་པའི་དྲུང་དུ་སོང་ནས།
ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ཏེ་གསོལ་བ་བཏབ་པས།
རི་གསུམ་རྩེ་ནས་དུང་འབུད་ཅིང༌། །ལུང་གསུམ་མདོ་ནས་ལམ་སྣ་འདྲེན།
།བུམ་ནང་མར་མེ་འབར་བ་ཡིས། །འཛམ་གླིང་ཐམས་ཅད་གསལ་བར་རྨིས།
།དཔལ་ནཱ་རོ་པ་དང་མཇལ་ཏེ་འོང༌། ཞེས་གསུངས།
དེ་ནས་དགེ་ཚུལ་ཤེས་རབ་སེང་གེའི་མདུན་དུ་ཚོགས་ཀྱི་འཁོར་ལོ་ཟླ་བ་གཅིག་བསྐོར་ནས་གསོལ་བ་བཏབ་པས།
བདག་གི་མྱ་ངན་ཐང་ཆེན་ལས། །དམུས་ལོང་ཁྲིད་དེ་གཉིས་ལ་བཏད།
།གཉིས་ཀྱི་རབ་རིབ་མིག་ཕྱེས་ནས། །སེམས་ཀྱི་མེ་ལོང་བལྟ་བ་རྨིས།
།དཔལ་ནཱ་རོ་པ་དང་མཇལ་ཏེ་འོང༌། གསུངས།
ཡང་རི་རི་པའི་མདུན་དུ་ཚོགས་ཀྱི་འཁོར་ལོ་ཟླ་བ་གཅིག་ལ་བསྐོར་ནས། གསོལ་བ་བཏབ་པས།
བྲམ་ཟེ་ཆེན་པོ་བཟང་ལྡན་གྱིས། རིགས་ངན་ཆོས་ཀྱི་རྒྱལ་པོ་ལ།
གསོལ་བཏབ་དགེ་བཟང་དཔང་བཙུག་པས། འབྲས་བུས་འདིར་ཡང་མཇལ་བར་ངེས། ཞེས་གསུངས།
དེ་ནས་ཀ་སོ་རི་པའི་མདུན་ཏུ་ཟླ་བ་གཅིག་ལ་ཚོགས་ཀྱི་འཁོར་ལོ་བསྐོར་ཞིང་གསོལ་བ་བཏབ་པས།
ཡང་དག་ཟླ་བའི་དཀྱིལ་འཁོར་དུ། །སེམས་ཉིད་ཆོསསྐུའི་མེ་ལོང་ནི། །མི་གཡོ་པུ་ལ་ཧ་རི་ན།
།ནཱ་རོ་པ་ཡི་སྟོན་པར་འགྱུར། ད་སྟེ་ཟླ་བ་བརྒྱད་ན་པུ་ལ་ཧ་རིར་མཇལ་བར་གདའ་འོ།
།ཞེས་ལུང་བསྟན་ཏོ།
།གཞན་ཡང་སྦས་པའི་རྣལ་འབྱོར་པ་ལྔ་རྣལ་འབྱོར་མ་དྲུག་སྟེ་བཅུ་གཅིག་གི་མདུན་དུ་ཚོགས་ཀྱི་འཁོར་ལོ་བསྐོར་ནས་གསོལ་བ་བཏབ་པས་མཇལ་བར་ལུང་བསྟན་ཏོ།
།དེ་ནས་ནཱ་ལེནྡྲར་བྱོན་ནས་བཞུགས་ཀྱང་བླ་མ་དྲན་ནས་སྡོད་མ་ཚུག་པར་ཕྱོགས་ཐམས་ཅད་དུ་ཚོལ་དུ་བྱོན་པས་ཙནྡན་སྡོང་པོར་འཇའ་གུར་དུ་ཀྱཻ་རྡོར་ལྷ་དགུ་ཐུགས་ཀའི་སྔགས་ཕྲེང་དང་བཅས་པ་མཇལ་བ་དང༌།
རྨི་ལམ་དུ་ཟླ་བའི་སྟེང་དུ་ནཱ་རོ་པ་སེང་གེ་ཆིབས་ནས་བཙུན་མོ་གཉིས་ཀྱིས་བརྟེན་ནས་གླུ་གར་བྱེད་པ་རྨིས་པ་དང༌།
ཡང་ཤེལ་གྱི་ཕ་བོང་གཅིག་གི་སྟེང་དུ་བླ་མ་གཤེགས་པའི་ཞབས་རྗེས་གསལ་བར་དོད་པ་མཐོང་བས།
འཇའ་ཚོན་ལྟ་བུའི་སྐུ་ཝལ་གྱིས་མཐོང་བ་དང༌། ཤིན་ཏུ་གསལ་བ་ཞིག་མཐོང་བ་དང༌།
ཙནྡན་གྱི་ནགས་ཚལ་དུ་སྐུ་གཟི་མདངས་ལ་མེ་འབར་བ་མཐོང་བ་དང༌།
བྲག་ཕུག་ཞིག་ཏུ་ཐོད་ཁྲག་གསོལ་ཞིང་བཞུགས་པའི་འཕྲོ་བདག་ལ་གནང་བས་བདེ་སྟོང་ཐུགས་ལ་ཤར་བ་དང༌།
དེ་རྣམས་ནི་ཡུད་ཙམ་ནས་མི་སྣང་བར་གྱུར་པའོ།
།དེ་ནས་ཡང་གསོལ་བ་བཏབ་ནས་ཚོལ་བས་རི་བོ་གསེར་གྱི་དགོན་བྱ་བར་བླ་མ་སྐུ་གཟི་མདངས་ཅན་ཁཊྭཱྃ་ཐོད་པ་བསྣམས་ནས་གར་མཛད་པ་མཇལ་བས་དེ་མ་ཐག་དགའ་ཆེས་ཏེ་གསེར་སྙིམ་པས་གཅུས་ནས་ཕུལ་ཏེ།
ཕ་རྗེ་བཙུན་ཐུགས་རྗེས་བཟུང་དུ་གསོལ།
ཞུས་པས་བླ་མ་དཀོན་མཆོག་མཆོད་གསུངས་ནས་གསེར་རྣམས་ནགས་ཚལ་གསེབ་ཏུ་གཏོར།
མར་པས་བོད་ནས་དཀའ་སྡུག་གིས་བཙལ་སྙམས་པས། བུ་འདོད་ན་ཐམས་ཅད་གསེར་གླིང་ཡིན་ནོ་གསུངས།
གོང་གི་ཕུལ་བའི་གསེར་རྣམས་རང་གི་སྙིམ་པར་བྱུང་ཞིང་ཡང་མི་སྣང་བར་གྱུར།
ཡང་མོས་གུས་གྱིས་བཙལ་བས་རི་བོ་གསེར་གྱི་དགོན་པར་ནགས་ཚལ་ཕུན་སུམ་ཚོགས་པར་ནཱ་རོ་པ་སྐུ་གཟི་མདངས་དང་ལྡན་ཞིང་རུས་པའི་རྒྱན་དྲུག་གིས་བརྒྱན་པ་ཕྱག་ན་ཌཱ་མ་རུ་དང་ཐོད་པ་ཐོགས་པ་ལམ་མེར་མཇལ་བས།
ཐུགས་རྗེ་མ་ཆུང་ཞེས་སྐད་མི་ཐོན་ཙམ་དུ་གསོལ་བ་བཏབ་པས་ཙནྡན་གྱི་སྡོང་པོ་གཅིག་གི་རྩ་བར་བཞུགས་པ་ལ་གསེར་གྱི་མཎྜལ་ཕུལ་ཞིང་ཕྱག་འཚལ་ནས་ཞབས་ལ་འཇུས་ཤིང་སྤྱི་བོར་བཞག་སྟེ།
ང་བོད་ནས་དཀའ་ལས་མང་པོ་བྱས་ནས་འོང༌།
འདིར་བླ་མ་མ་རྙེད་ནས་དཀའ་བ་དཔག་ཏུ་མེད་པ་སྤྱད་པ་ལ་རྗེ་བཙུན་དེ་ཙམ་དུ་ཐུགས་རྗེ་ཆུང་བ་ཞེས་ཡུས་ཀྱིས་བརྣངས་ནས་སྤྱན་ཆབ་མང་པོ་ཕྱུང་བ་ལ།
ང་དུས་རྟག་ཏུ་ཁྱོད་དང་མ་བྲལ་བསྡད་པ་ལ་ཁྱོད་རང་ལས་ཀྱི་སྒྲིབ་པས་བསྒྲིབས་ནས་རང་གི་བག་ཆགས་ཀྱིས་མ་མཐོང་བ་ཡིན།
ད་ལྟ་བག་ཆགས་ངན་པ་དང༌། སྒྲིབ་པ་ཐམས་ཅད་དག་ནས་མཐོང་བ་ཡིན་གསུངས།
དེ་ནས་ཡབ་སྲས་འགྲོགས་ནས་པཱུ་ལ་ཧ་རིར་བྱོན་པའི་ལམ་ན་ཡེ་ཤེས་མཁའ་འགྲོ་མང་པོས་ནཱ་རོ་པ་ལ་མཆོད་པ་ཕུལ་ནས།
ལུང་བསྟན་མར་པ་བློ་གྲོས་ནི། །ཡང་དག་མཐར་ཕྱིན་སྡོང་གྲོགས་བྱེད།
།ཟླ་གསུམ་སོང་བའི་ནང་པར་ནས། །རྗེ་བཙུན་དཔལ་ལྡན་ནཱ་རོ་པ། །པུ་ལ་ཧ་རིའི་དགོན་པ་ནས།
ཤིང་རྟ་ཆེན་པོའི་རྟར་བསྐྱོད་དེ། །ཨོ་རྒྱན་རང་བྱུང་དུར་ཁྲོད་དུ།
ལུང་བསྟན་རང་གྲོལ་མཁའ་འགྲོས་བསུ། ཞེས་གསུངས་ནས་ནམ་མཁར་གཤེགས་སོ། ། ༡
ཕ་རིའི་སྤང་གི་ལྡེབས་ལ།། མེ་ཏོག་སྣ་ཚོགས་ཡོད་རེད།། བློ་ལ་ཡོད་པའི་མེ་ཏོག།
མཛུབ་མོ་བཙུགས་ནས་བཞག་ཡོད།། ས་འདི་འབྲས་མོ་ལྗོངས་ལ།། འབྲས་ཀྱི་འབྲས་གླུ་སྙན་པ།།
གཞོན་པ་གནས་བཟང་བསྐོར་མཁན།། འབྲས་ཆང་བཞེས་པར་ཕེབས་ཤོག། དབྱར་དགུན་འགྱུར་བ་མེད་པ།།
ལྷ་ཤིང་ཤུག་པ་ཡིན་འདུག། དེ་ལ་བྱིའུ་ཆུང་འཇོལ་མོའི།། གནས་ཚང་གཡར་དགོས་བསམ་བྱུང༌།།
རྟ་ཕོ་དུལ་བ་རྐྱང་པོ།། རྟ་གདན་དུལ་བ་གྲུ་བཞི།། མཛེས་པོའི་སྲབ་མདའ་མི་དགོས།།
སེམས་ཀྱིས་ཁ་ལོ་གཅུས་ཆོག། ཀོ་བ་ཆུ་མོའི་གཞུང་ལ།། འགྲོ་གིས་བསམ་པ་མ་གཏོགས།།
མཉན་དཔོན་བསོད་ནམས་སྟོབས་རྒྱལ།། མཇལ་ཡོང་བསམ་པ་མ་བྱུང༌།། གསེར་གྱི་ཐོག་ཁར་འགྲོ་བར།།
དངུལ་གྱི་སྐས་འཛེགས་དགོས་ཀྱིས།། ཡིད་འཕྲོག་མཛེས་མ་འཚོལ་བར།།
རྡོ་ཡི་ཞགས་པ་དགོས་ཀྱིས།། འཇའ་སྤྲིན་སྨུག་པའི་གསེབ་ཀྱི།། གཡུ་འབྲུག་ཉི་མ་ཟླ་བ།།
ལོ་ཡག་རྩ་བ་ཚུགས་སོང༌།། སྦྲང་ཆར་ཕབ་རོགས་གནང་དང༌།། ལྡུམ་ར་ཉི་མ་དྲོ་བ།།
པད་མ་བཞད་ཁ་ཕྱེ་སོང༌།། ཟིལ་བ་འདི་རུ་མི་བབས།། དགོངས་པ་གང་ལ་བཞེས་པ།།
ལྷ་ཤིང་ཤུག་པའི་རྩེ་ལ།། ཁུ་བྱུག་གཞོན་ནུ་བབས་འདུག། གསུང་སྐད་མང་པོ་མི་དགོས།།
སྙན་པོའི་གསུང་ཞིག་གནང་དང༌།། ༢ དབྱར་ཁ་ཆུ་མིག་གང་ཡོད།། དགུན་ཁ་བལྟས་ན་མཐོང་ཡོད།།
བུ་མོའི་ལས་འཕྲོ་གང་ཡོད།། བལྟས་ན་མཐོང་ས་མ་རེད།། འཇམ་པོའི་བལ་གྱིས་བཟོས་པའི།།
འུར་རྡོ་ཆུ་མིག་དགུ་སྒྲིལ།། ལི་ཐང་གཞུང་ནས་བརྒྱབ་པས།། གཡུ་ཐོག་གཞུང་ལ་བབས་སོང༌།།
ཡར་འབྲོག་མཚོ་མོའི་སྟེང་གི། གསེར་གྱི་ཆོས་གོས་བཞེས་པ།། ཉ་མོ་རུས་རྒྱན་ཞེས་པ།།
གར་སོང་ཤོད་རོགས་གནང་དང༌།། རྒྱ་གར་གནས་རི་མཐོ་བ།། ཙན་དན་ནགས་གསེབ་སྟུག་པ།།
ལྷ་བྱ་འབབ་དགོས་བསམ་ཡང༌།། གངས་མ་ཆར་གྱིས་བསྒྲིབས་སོང༌།། ༣ མཚོ་སྟོད་གསེར་བྱ་ངང་བ།།
མཚོ་སྨད་གཡུ་བྱ་ངང་བ།། ལས་དང་ལས་འཕྲོ་ཡོད་ན།། མཚོ་དཀྱིལ་འདི་རུ་ཕེབས་དང༌།།
བསང་དེ་སྔ་བསང་དགོང་བསང༌།། རྩིག་པའི་ཟུར་ནས་བཏང་ཡོད།། ལས་འཕྲོ་ཡོད་པའི་ཕོ་རོག།
ཕྱེ་མར་བཞེས་པར་ཕེབས་དང༌།། རྒྱ་ནག་དཀར་ཡོལ་མང་བ།། དཀར་ཡོལ་ཡུ་རིང་དཀོན་པ།།
དྭགས་ཀོང་ཤིང་སྣ་འཛོམས་པ།། མཆོད་ཞལ་རྫབ་ཡ་དཀོན་པ།། ༤ མི་ཆོས་སྨྱུག་མའི་ནང་ལ།།
སྟོང་སྐུད་ལྷས་མ་རྒྱག་གིས།། ང་གཉིས་གཉིས་པོའི་ལས་དེ།། བྱིའུ་ཚང་གསོག་ལས་དཀའ་བ།།
ཆུ་མོ་ཆུ་རིས་ཤིག་ཤིག། ལྷགས་པའི་རྒྱག་ཕྱོགས་ཡིན་པ།། ང་གཉིས་དཔུང་བ་གཤིབ་གཤིབ།།
གོམ་པའི་སྤོ་ཕྱོགས་ཡིན་པ།། སྤང་ལ་སྐྱེས་པའི་མེ་ཏོག། བུ་མོས་གནང་གི་ཡོད་ན།།
དེ་ལ་ཕན་པའི་ཆར་ཞིག། མེད་པ་རང་ད་མ་རེད།། ལ་མོ་གྲུ་བཞི་ལྡེག་ལྡེག།
ལ་རྫས་གསོལ་སྙིང་འདོད་བྱུང༌།། ཆུང་འདྲིས་བློ་གཞི་ལྡོང་ལྡོང༌།།
སྙིང་གཏམ་ཤོད་སྙིང་འདོད་བྱུང༌།། ༢ ཆུང་འདྲིས་ལགས་ཀྱི་སེམས་དེ།།
ལྕང་མ་རློན་པའི་ཟམ་པ།། ཕྱིན་ན་ལྡམ་མེ་ལྡེམ་མེ།། མ་ཕྱིན་སེམས་པས་མི་བཟོད།།
ཁང་ཆུང་དཀར་པོའི་ལྡེབས་ལ།། རིན་ཆེན་གསེར་ཡིག་བྲིས་འདུག། བྲིས་འདོད་བློ་ལ་ཡོད་ཀྱང༌།།
ཕྲ་ཆུང་མིག་གིས་མི་ཟིན།། ཨོ་ལོའི་ཆུང་འདྲིས་བྱམས་པ།། གཞན་དང་ནོར་བ་མི་འདུག།
ཞྭ་མོ་ཝ་ཞྭའི་སྟེང་ལ།། པ་ཏྲ་བརྩེགས་གསུམ་བརྒྱབ་ཡོད།། སེ་སྡོང་སྡོང་པོའི་སྟེང་ལ།།
སེ་འབྲུ་ཉི་ཤུ་ཐམ་པ།། གཅིག་ནི་ལས་ལ་བསྐོས་སོང༌།། བཅུ་དགུ་དགོངས་པ་ཞུ་རྒྱུ།།
ཁམ་སྡོང་མཐོ་རང་དྲགས་ནས།། ལག་པ་ཐུག་ས་མ་རེད།། འབྲས་བུས་ཐུགས་བསམ་བཞེས་ནས།།
ཨམ་ཕྲག་ནང་དུ་ལོག་ཤོག། བྱམས་པས་ལྕང་མའི་གསེབ་ནས།། གསང་བརྡ་གཏོང་བ་གནང་བྱུང༌།།
བུ་མོ་ང་རའི་སེམས་ལ།། ལོ་མའི་སྒྲ་རེད་བསམ་བྱུང༌།། སྤྲིན་པ་ལྷོ་སྤྲིན་བྱང་སྤྲིན།།
ཕར་ཤིག་ཚུར་ཤིག་གནང་དང༌།། བློ་ལ་ཡོད་པའི་སྐར་མ།། ཨེ་ཤར་མི་ཤར་ལྟ་དགོས།།
ཟངས་ཆུང་བུམ་པ་དམར་པོ།། ཞལ་བསང་གནང་རོགས་གནང་དང༌།། རྨ་བྱའི་སྒྲོ་མདོངས་ང་ནི།།
རང་མགོ་ཐོན་པའི་ཁྱད་འདུག། ཞིང་ལ་སྲན་མ་བཏབ་ཡོད།། མཐའ་ལ་འགག་པ་བརྒྱབ་ཡོད།།
སྲན་མ་ཟ་སྙིང་འདོད་ན།། འགག་པ་རྡོག་པས་མནན་ཤོག། ཆུ་མིག་ཆུ་ནི་བཟང་བ།།
བུམ་བཀྱག་རྐང་བཞི་འགྲིགས་པ།། དེ་ནས་ཆུ་གཅིག་བླངས་ན།། བཀའ་བཀྱོན་གནང་མཁན་ཨེ་ཡོད།།
མ་གཞི་སོར་གདུབ་དངུལ་རེད།། ཁྲ་ཀོང་རིན་ཆེན་གསེར་རེད།། དྲུག་དམར་གཡུ་ཞིག་བརྒྱབ་ན།།
མ་རེད་ཟེར་མི་ཨེ་ཡོད།། ང་རང་མི་འགྲོ་བསམ་ཡང༌།། རྟ་ཕོས་མཚན་བསླངས་བཏང་བྱུང༌།།
རང་སེམས་རང་ལ་མི་གནས།། བྱམས་པའི་ཕྱོགས་ལ་ཤོར་སོང༌།། དཀར་གསལ་ཟླ་བ་ལྟ་བུའི།།
དཀར་ཚད་ཁྱེད་ལ་ཡོད་ན།། ཁ་ཆར་སྤྲིན་པ་མེད་པ།། བུ་མོ་ང་རས་ཞུས་ཆོག།
སྐར་མ་ཐ་རེ་ཐོ་རེ།། ག་ས་ག་ནས་ཤར་བྱུང༌།། སྙིང་དང་འདྲ་བའི་སྐར་ཆེན།།
གྲོང་སྟོད་ཡེ་ནས་ཤར་བྱུང༌།། སེམས་ལ་ཡོད་པའི་མི་དེས།། སྤྱན་ཞིག་གཟིགས་པ་གནང་དང༌།།
རྒྱ་མཚོའི་ནང་གི་ནོར་བུ།། ལོན་ཐབས་ང་རས་ཞུས་ཆོག། ལྷ་སའི་བུམ་པ་རི་འདི།།
རི་མགོ་མཐོ་བར་མ་བལྟས།། བསང་འདི་ཨ་དྲུང་མཁན་པའི།། དྲི་མཆོག་ཞིམ་པར་བལྟས་ཡོད།།
མདའ་མོ་འབེན་ལ་ཕོག་སོང༌།། མདེའུ་ས་ལ་འཛུལ་སོང༌།། ཆུང་འདྲིས་བྱམས་པ་འཕྲད་བྱུང༌།།
སེམས་ཉིད་རྗེས་ལ་འབྲངས་སོང༌།། བསམ་ཡས་ལྕོག་གི་སྟེང་ནས།། རྒྱ་གླིང་ཕོ་སྐད་མོ་སྐད།།
གཏོང་མཁན་ཨེན་ཆུང་པ་སངས།། ཉན་མཁན་འོད་གསལ་སྒྲོན་མ།། གསེར་བྱ་ངང་པ་ཆགས་པ།།
སྔོན་མོའི་མཚོ་ལ་ཡིན་འདུག། དེ་ལ་བཅངས་པའི་བརྩེ་དུང༌།། མཚོ་མོའི་ནང་ནས་གསལ་ཡོང༌།།
ཆུང་འདྲིས་ལུང་བའི་ཕུ་བྱས།། ང་རང་ལུང་བའི་མདའ་བྱས།། སེམས་པ་ཆུ་ལ་སྐུར་ཤོག།
རག་སྐྱོགས་སེར་པོས་གཅུས་ཆོག། ཁྱེད་སེམས་རྫ་ཡི་བུམ་པ།། བུམ་རྫས་གང་ཡོད་མི་ཤེས།།
ང་སེམས་ཤེལ་གྱི་བུམ་པ།། ཕྱི་གསལ་ནང་གསལ་ཡིན་ནོ།། རྩོམ་ཁུངས་། མཆོད་མེ་དྲ་བ་། x
Comments
Post a Comment